Карпянкоў аб’яднаў «вайскова-патрыятычныя клубы» ў фонд «Маладая гвардыя»

Намеснік міністра ўнутраных справаў Мікалай Карпянкоў 19 траўня прэзентаваў фонд «Маладая гвардыя», які аб’ядноўвае 18 «вайскова-патрыятычных клубаў», у склад якіх уваходзяць звыш 2 тысяч дзяцей па ўсёй Беларусі.

Навучэнцы «вайскова-патрыятычных клубаў» на прэзентацыі фонду «Маладая гвардыя». Менск, Беларусь. 19 траўня 2024 года.

Фота: Внутренние войска МВД / Telegram

Аб адкрыцці фонду абвясцілі ў вайсковай частцы 3214 – базе ўнутраных войскаў у менскім Уруччы.

«Нашыя выхаванцы паспяхова засвойваюць ваенную навуку, – казаў Мікалай Карпянкоў. – Ужо ёсць першыя выпускнікі і тыя, хто паступіў у ведамасныя навучальныя ўстановы ці пайшоў служыць па кантракце».

Ён растлумачыў, што ўзяў назву савецкай падпольнай арганізацыі, бо беларускія дзеці – праўнукі пераможцаў Вялікай айчыннай вайны.

У ліку прысутных на адкрыцці быў былы памочнік Аляксандра Лукашэнкі і саўладальнік «Брэміна груп» Аляксандр Зайцаў, прапагандыст і старшыня «Белтэлерадыёкампаніі» Іван Эйсмант і іншыя, у тым ліку дырэктарка фонду, змагарка з анархістамі Ала Веруш, якая выгадавала дачку-нацыстку.

Галоўная ідэя фонду «Маладая гвардыя», як сцвярджаецца, у тым, каб развіваць «патрыятычны рух» сярод моладзі і прыцягваць на гэта спонсарскую дапамогу. У апякунскую раду ўвайшлі 13 чалавек, сярод іх палітыкі, прадпрымальнікі і супрацоўнікі дзяржаўных медыяў.

Дзяцей, як паказалі на цырымоніі, навучылі рукапашнаму бою, зборцы-разборцы аўтамата Калашнікава, стральбе з розных відаў зброі, кіраванню дронамі.

Навучэнцы «вайскова-патрыятычных клубаў» на прэзентацыі фонду «Маладая гвардыя». Менск, Беларусь. 19 траўня 2024 года.

Фота: Внутренние войска МВД / Telegram

Улады робяць ухіл на вайсковую адукацыю школьнікаў. Толькі за гэты навучальны год колькасць кіраўнікоў гэтак званага вайскова-патрыятычнага выхавання павялічылася на 400 чалавек, значна перавысіўшы дзве тысячы ваенрукоў. У гэтак званых вайскова-патрыятычных класах навучаюцца амаль 4 тысячы дзяцей. Яшчэ ёсць кадэцкія вучэльні, у якіх агулам па Беларусі – 1800 падлеткаў.

Карпянкоў паралельна займаецца стварэннем усё новых атрадаў спецназу для «барацьбы з дыверсійна-выведнымі групамі і незаконнымі ўзброенымі фармаваннямі». Гэтыя «карпянкоўцы» ўжо ўдзельнічаюць у палітычных рэпрэсіях.

Алесь Наваборскі belsat.eu

Reakcja

0%0Pozytywnie0%0Neutralnie 0%0Negatywnie

Twoje emocje

0%0Lubię to!

0%0Super0%0Ekscytujący 0%0Ciekawy0%0Smieszny0%0Smutny0%0Wściekły0%0Przerażony0%0Szokujący0%0Wzruszający0%0Rozczarowany0%0Zaskoczony

Co sądzisz?

0%0Prawda0%0Manipulacja0%0Fake news

0

0Ulub

Oryginalne źródło ZOBACZ