Затрыманых у Віцебскай вобласці каталіцкіх святароў судзілі дыстанцыйна

Суд над затрыманымі ў Віцебскай вобласці святарамі прайшоў 10 траўня дыстанцыйна, паведамляе Katolik.life са спасылкай на аповеды вернікаў.

Айцец Анджэй Юхневіч і айцец Павел Лемех.

Фота: «Katolik.life»

Святароў не прывезлі ў віцебскі суд і разглядалі іхную справы праз скайп. Вынік суду вернікам і духавенству не паведамілі, аднак вядома, што святары застаюцца ў зняволенні, што значыць, што ім быў прысуджаны адміністратыўны арышт.

8 траўня міліцыяй былі затрыманыя айцец Анджэй Юхневіч і айцец Павел Лемех з ордэну Місіянераў Аблатаў Беззаганнай Дзевы Марыі, якія служаць у дыяцэзіянальным санктуарыі ў Шуміліне.

Паведамленні адносна зняволеных святароў выпусціла польская правінцыя Місіянераў Аблатаў. Яна запрасіла да малітвы «у сувязі з цяжкім становішчам» двух місіянераў, якія былі затрыманыя, адзначаецца ў камунікаце.

Супольную малітву прызначылі на вечар 10 траўня «у інтэнцыі вызвалення субратоў». З гэтага таксама вынікае, што святары застаюцца за кратамі. Занепакоенасць сітуацыяй і сваю салідарнасць выказаў з Рыму генерал кангрэгацыі.

Раней польская правінцыя Місіянераў Аблатаў паведамляла, што, паводле яе звестак, падставай для затрымання стала падазрэнне ў нейкай «дыверсійнай дзейнасці».

Katolik.life звязаўся з правінцыяй з просьбай патлумачыць, што маецца на ўвазе, бо ў польскай мове «dywersyjna działalność» можа мець розныя сэнсы. Аднак там адказалі, што не могуць паведаміць нічога, акрамя афіцыйна апублікаванай інфармацыі.

Акрамя таго, Katolik.life распавялі пра яшчэ адно затрыманне ў Шуміліне. У той жа дзень, калі сілавікі прыехалі да святароў, толькі на некалькі гадзінаў раней, па месцы працы затрымалі свецкую верніцу, парафіянку касцёлу ў Шуміліне. Гэта маладая жанчына, педагог, удзельніца душпастырства моладзі Віцебскай дыяцэзіі, раней была вакалісткай музычнага гурта. Цяпер яна таксама знаходзіцца ў зняволенні ў Віцебску.

10 студзеня 2024 года ў Мюнхене быў апублікаваны рапарт таварыства «Дапамога Касцёлу ў патрэбе». У дакуменце гаворыцца, што ў Беларусі вядома пра 10 арыштаў ксяндзоў. Напрыканцы 2023 года трое з іх яшчэ заставаліся за кратамі. Нашая краіна апынулася на другім месцы па колькасці выпадкаў пераследу ў дачыненні прадстаўнікоў Каталіцкага Касцёлу. На першым месцы – Нікарагуа.

Марыя Міхалевіч belsat.eu

Reakcja

0%0Pozytywnie0%0Neutralnie 0%0Negatywnie

Twoje emocje

0%0Lubię to!

0%0Super0%0Ekscytujący 0%0Ciekawy0%0Smieszny0%0Smutny0%0Wściekły0%0Przerażony0%0Szokujący0%0Wzruszający0%0Rozczarowany0%0Zaskoczony

Co sądzisz?

0%0Prawda0%0Manipulacja0%0Fake news

0

0Ulub

Oryginalne źródło ZOBACZ