Гомельскія дызель-цягнікі не могуць перасоўвацца самастойна. Прычына – у расейскіх устаноўках

Гомельскае выданне «Флагшток» звярнула ўвагу, што саставы рэгіянальных дызель-цягнікоў перасталі рухацца па маршрутах самастойна – іх перасоўваюць дадатковыя лакаматывы. Сітуацыю пракаментавала Таварыства чыгуначнікаў Беларусі.

Дызель-цягнік № 6474 Калінкавічы – Гомель. ДР1Б-506 з цеплавозам ЧМЭ3-2815. Станцыя Цэнтраліт, Гомельская вобласць. 1 траўня 2024 года.

Фота: Андрэй Каленчыкаў / railgallery.ru

Прычына, паводле экспертаў, – у няспраўнасці сілавой устаноўкі і цягавага прываду. На дызель-цягніках серыяў ДР1А і ДР1Б у прыпісным парку лакаматыўнага дэпо «Гомель» у якасці сілавой устаноўкі выкарыстоўваецца дызельны рухавік вытворчасці ПАТ «Звезда» (Санкт-Пецярбург, Расея). Цягавым прывадам выступае гідраўлічная перадача вытворчасці Калужскага заводу калейных машынаў і гідрапрывадаў.

«Асноўныя цягавыя агрэгаты, няспраўнасць якіх прымушае кіраўнікоў ісці на найгрубейшыя парушэнні з патэнцыйна цяжкімі наступствамі, вырабляюцца ў Расеі, замяніць іх няма чым. Пры гэтым, нават калі ў Беларускай чыгункі знойдуцца тыя немалыя сумы, якія патрабуюць расейскія вытворцы за сваю прадукцыю, апошнія не імкнуцца праводзіць адпаведныя ўгоды», – кажуць у Таварыстве чыгуначнікаў.

Паводле экспертаў Таварыства, выпуск на маршрут цягнікоў з няспраўнасцю прываду перасоўвання – парушэнне і «фактычна злачынства» чыгуначных начальнікаў згодна з асноўным дакументам Беларускай чыгункі – Правіламі тэхнічнай эксплуатацыі чыгуначнай дарогі ў Рэспублікі Беларусь.

«Гэта не проста надуманыя патрабаванні, а рэальныя тэхнічныя абмежаванні, якія маюць беспасярэдні ўплыў на бяспеку», – падкрэсліваюць эксперты і зазначаюць, што такая практыка можа прывесці да трагедыяў.

Правіла тэхнічнай эксплуатацыі ўтрымліваюць патрабаванні да лакаматываў, якія «выдаюцца» пад пасажырскія цягнікі. На іх абавязкова павінны быць прылады кіравання электрапнеўматычным тармажэннем. Такіх прыладаў няма на цяжкавых і манеўровых лакаматывах.

«Агулам эксплуатацыя, напрыклад, манеўровага лакаматыву з пасажырскім цягніком, паводле элементарнай логікі, не бяспечная», – сцвярджаюць эксперты Таварыства чыгуначнікаў і дадаюць, што «любое дзеянне машыніста, звязанае са змяненнем хуткасці – набор пазіцыяў ці тармажэнне, адчуваецца пасажырам літаральна і можа прывесці да траўмавання».

Паводле чыгуначнікаў, сітуацыя ў Гомлі – прыклад «давядзення БЧ да поўнай разрухі, і казаць пра нейкае яе развіццё і мадэрнізацыю не даводзіцца».

Марыя Міхалевіч belsat.eu

Reakcja

0%0Pozytywnie0%0Neutralnie 0%0Negatywnie

Twoje emocje

0%0Lubię to!

0%0Super0%0Ekscytujący 0%0Ciekawy0%0Smieszny0%0Smutny0%0Wściekły0%0Przerażony0%0Szokujący0%0Wzruszający0%0Rozczarowany0%0Zaskoczony

Co sądzisz?

0%0Prawda0%0Manipulacja0%0Fake news

0

0Ulub

Oryginalne źródło ZOBACZ