У Менск, прынамсі ў другі раз за два гады, прыбыў рэктар іранскага ўніверсітэту, што займаецца распрацоўкай зброі. Пра яго візіт паведамілі ў Міністэрстве абароны Беларусі. Верагодна, краіны збіраюцца нарошчваць вайсковую супрацу ў межах новай «восі зла». Падрабязнасці гэтага – у матэрыяле «Белсату».
Мэхдзі Джафары падчас наведвання БНТУ. 15 лютага 2023 г., Менск.
Фота: bntu.by
Пра тое, што ў Менску знаходзіцца намеснік міністра абароны Ірану, рэктар Тэхналагічнага ўніверсітэту імя Маліка Аштара Мэхдзі Джафары, 22 красавіка паведаміў начальнік Дэпартаменту міжнароднай вайсковай супрацы Мінабароны Беларусі Валерый Равенка. Паводле яго, у Менску Джафары плануе наведаць шэраг навуковых установаў Збройных сілаў і Нацыянальнай акадэміі навук Беларусі. Дакладныя мэты візіту не называюцца.
Гэта ўжо не першы прыезд Джафары ў Беларусь. Папярэдні быў у лютым 2023 года. Тады ён, яшчэ будучы прарэктарам, выказваў зацікаўленасць у азнаямленні з факультэтамі тэхнічнага профілю Беларускага дзяржаўнага ўніверсітэту (БДУ).
«У сувязі з высокай зацікаўленасцю членаў дэлегацыі распрацоўкамі БНТУ сустрэча прадоўжылася наведваннем лабараторый прыборабудаўнічага і механіка-тэхналагічнага факультэтаў. Калегам з Ірану былі прадэманстраваны аптычныя і лазерныя прыборы, тэхналогія ліцця і плаўкі», – раскрывалі падрабязнасці візіту ў Беларускім нацыянальным тэхнічным універсітэце.
Таксама, сярод іншага, было дамоўлена пра стажыраванне выкладчыкаў і студэнтаў Тэхналагічнага ўніверсітэту Маліка Аштара ў БНТУ.
Што за ўніверсітэт такі?
Тэхналагічны ўніверсітэт імя Маліка Аштара ў Іране быў заснаваны ў 1984 годзе ў выніку рэарганізацыі вытворчасці зброі ў краіне. Арганізацыя Аб’яднаных Нацый, Еўразвяз і ЗША мяркуюць, што ўніверсітэт датычны да ядравай праграмы Ірану і служыць прыкрыццём для арганізацыі, адказнай за вытворчасць ядравых боегаловак. Універсітэт не пускае да сябе наведнікаў, а інспектарам МАГАТЭ забараніў праводзіць сумоўе з ягонымі супрацоўнікамі. Універсітэт займаецца распрацоўкай і вытворчасцю іранскіх ракетаносьбітаў, а іранскія апазіцыянеры заяўлялі, што ён таксама спрыяў распрацоўцы біялагічнай зброі. ВНУ трапіла пад санкцыі ААН і Еўрапейскага Звязу.
Міністр абароны Ірану прызначае Мэхдзі Джафары рэктарам Тэхналагічнага ўніверсітэту імя Маліка Аштара.
Фота: farsnews.ir
Сам універсітэт падначальваецца іранскаму Мінабароны. Летась, пасля прызначэння на пасаду рэктара, Джафары распавядаў іранскім медыям пра планы трансфармацыі ўніверсітэту каб «рухацца ў мэтах вызначэння будучых патрэбнасцяў Збройных сілаў» і рэалізацыі «стратэгічных гарызонтаў будучыні» Міністэрства абароны.
«Наша мэта – гуляць цэнтральную ролю ў распрацоўцы новых і перспектыўных тэхналогіяў, неабходных цяперашнім і будучым Збройным сілам», – казаў рэктар.
Для гэтага, паводле яго, плануецца павышаць эфектыўнасць даследаванняў на падставе патрэбаў Мінабароны, пашыраць тэхналагічную супрацу з іншымі ўніверсітэтамі, у тым ліку міжнароднымі, і пазбавіцца «тэхналагічна вузкіх месцаў».
Для гэтага ўжо былі заключаныя пагадненні з дзевяццю «сяброўскімі» краінамі:
«Вядома, мы павінны выкарыстоўваць патэнцыял гэтых краін у даследчых галінах і надаваць ім паслугі».
Далейшае ўцягванне Беларусі ў «вось зла»
Візіт іранскага госця ў Менск адбываецца неўзабаве пасля ракетнай атакі Ірану на Ізраіль і меркаванага ўдару ў адказ габрэйскай дзяржавы па Ісфахане, побач з якім размешчаныя ядравыя аб’екты.
Іранская дэлегацыя на чале з Мэхдзі Джафары падчас наведвання БНТУ. 15 лютага 2023 г., Менск.
Фота: bntu.by
Як адзначае аўтар і вядоўца праграмы «ПраСвет» на «Белсаце» Сяргей Пеляса, супраца паміж Беларуссю і Іранам у сферы вайсковай прамысловасці ідзе даўно, але яна актывізавалася разам з адкрытай агрэсіяй Расеі супраць Украіны. Паводле яго, гэта звязана з тым, што Беларусь пад кіраўніцтвам Аляксандра Лукашэнкі сталася часткай новай восі зла, да якой належаць таксама Расея, Іран, Паўночная Карэя.
«Пасля паездкі Лукашэнкі ў Маскву, а таксама пасля абвастрэння канфлікту паміж Ізраілем і Іранам паўстала пэўная новая сітуацыя, калі ад Лукашэнкі патрабавалі больш глыбокага заангажавання ў вайну. Напрыклад, мабілізаваць магчымасці беларускай прамысловасці, беларускага ВПК, беларускага войска на патрэбу Расеі», – кажа Пеляса.
На яго думку, Масква і Тэгеран схіляюць рэжым Лукашэнкі да вытворчасці на тэрыторыі Беларусі ўдарных дронаў тыпу «Шагэд-136». Раней падобныя звесткі падаваў амерыканскі Інстытут вывучэння вайны ISW. Паводле яго, са жніўня 2023-га вялося пра выраб іранскіх дронаў у Беларусі. Тады ж Іран наведаў лукашэнкаўскі міністр абароны Віктар Хрэнін. На думку Пелясы, менавіта з вытворчасцю дронаў у Беларусі – яе запускам або інтэнсіфікацыяй, калі яны ўжо запушчаная – і можа быць звязаны візіт у Менск іранскага чыноўніка.
«Дроны «Шагэд» патрэбныя расейцам для правядзення варварскіх атак па Украіне. І для таго, каб прыспешыць іх вытворчасць, рабіць іх больш, Беларусь, магчыма, далучылася да вытворчасці гэтых дронаў», – мяркуе Пеляса.
Іранская дэлегацыя на чале з Мэхдзі Джафары падчас наведвання БНТУ. 15 лютага 2023 г., Менск.
Фота: bntu.by
У сваю чаргу Тэгеран зацікаўлены ў тэхналогіях для развіцця сваіх ядравай і ракетнай праграмаў. У прыватнасці, яму могуць быць цікавыя беларускія ракетныя комплексы «Паланэз» ды агулам абыход санкцыяў.
«Іран не валодае некаторымі тэхналогіямі, або мае абмежаваныя магчымасці і можа не мець нейкіх навукова-тэхнічных інстытутаў, якія маглі б гэтыя тэхналогіі апрацаваць. У Беларусі захаваліся тэхналогіі, звязаныя з электронікай, з оптыкай, ракетныя тэхналогіі. Іран усё-такі ўжо больш за 40 год функцыянуе ў ізаляцыі», – адзначае Пеляса.
Паводле яго, навукова-тэхналагічная супраць паміж Менскам і Тэгеранам будзе толькі пашырацца, бо «Іран убачыў, што ягоныя дроны і ракеты не такія добрыя, як маглі падавацца – яны да Ізраілю амаль не даляцелі». Пашырэнне гэтай супрацы Беларусі з Іранам, мяркуе Пеляса, будзе яшчэ глыбей уцягваць нашу краіну ў «вось зла». Пра гэта ж, на яго думку, сведчыць і нядаўні візіт беларускай дэлегацыі ў Паўночную Карэю – «гэта падзеі, звязаныя паміж сабой».
Разбор
Сустрэліся дзве Паўночныя Карэі. Што Менск хоча атрымаць ад Пхеньяна
2024.04.17 19:40
Макар Мыш belsat.eu
Zgłoś naruszenie/Błąd
Pozytywnie
Neutralnie 
Negatywnie
Lubię to!
Super
Ekscytujący 
Ciekawy
Smieszny
Smutny
Wściekły
Przerażony
Szokujący
Wzruszający
Rozczarowany
Zaskoczony
Prawda
Manipulacja
Fake news
Oryginalne źródło ZOBACZ
Dodaj kanał RSS
Musisz być zalogowanym aby zaproponować nowy kanal RSS