Ці паўторыць Харкаў лёс Марыўпаля?

Не праходзіць ніводнага дня, каб Харкаў не згадваўся ў вайсковых зводках. Горад бамбуюць з паветра, абстрэльваюць ракетамі. У горадзе кожны дзень адключаюць электрычнасць з-за разбурэння энергетычнай інфраструктуры. Адбываюцца перабоі з падачай вады. Цяпер яшчэ і тэлевышка, якую расейцы збілі ракетай Х-59 за некалькі хвілін да размовы прэзідэнта Украіны Уладзіміра Зяленскага з прэзідэнтам ЗША Джо Байдэнам.

Здымак мае ілюстрацыйны характар. Абломкі Харкаўскай тэлевежы пасля расейскага ўдары па вежы на ўскраіне Харкаву, Украіна. 22 красавіка 2024 года.

Фота: Vyacheslav Madiyevskyy / Reuters / Forum

Прэзідэнт Украіны назваў гэта акцыяй запалохвання і чарговай спробай абмежаваць горад у сувязі. А сувязь патрэбная як ніколі. Бо сем’і маюць патрэбу ў пастаянным кантакце. Калі бацькі жывуць у адным мікрараёне, а дзеці ў іншым, то падчас паветранай трывогі, асабліва, калі ёсць інфармацыя аб трапляннях і разбурэннях, сувязь гэта тое, што неабходна ў першую чаргу.

На фоне больш частых абстрэлаў і без таго вельмі складанай абстаноўкі на фронце некаторыя жыхары Харкава з’яжджаюць з гораду, каб перачакаць гэты жах у больш бяспечным месцы. Па-чалавечы гэта цалкам зразумела. Падштурхнуць ехаць са сваіх кватэраў у іншыя рэгіёны краіны ці за мяжу могуць нават значна менш інтэнсіўныя абстрэлы. Але ніякага загаду аб эвакуацыі не было. Людзі застаюцца ў горадзе. А гэта сотні і сотні тысяч чалавек.

Калі ўсім адначасова «сарвацца», то гэта ж будзе яшчэ столькі ж і хатніх гадаванцаў катоў, сабак, нават хамячкоў. Прынамсі жыццё нам гэта ўжо прадэманстравала.

Людзі працягваюць жыць і працаваць у такіх кашмарных умовах. Самі жыхары Харкава называюць свой горад нязломным.

Каб пераканацца ў тым, што яны маюць рацыю, дастаткова прачытаць навіны пра гарадское жыццё. Іх бамбуюць усімі відамі зброі, ім не даюць спаць па начах паветраныя трывогі, яны сядзяць без святла і вады па некалькі гадзін, але адкрываеш навіны і сярод іншага бачыш, што ў парку ад моцнага ветру павалілася дрэва і на фота відаць, як камунальнікі распілоўваюць ствол і прыбіраюць галінкі з прагулачных дарожак, каб людзі маглі гуляць і атрымліваць асалоду ад квітнеючага бэзу. Пра які ўвогуле захоп гораду можа пасля гэтага ісці гаворка?! Каго сабраліся напалохаць збітай тэлевышкай?!

Аналітыкі тым часам працягваюць сцвярджаць, што Пуцін апантаны ідэяй абязлюдзіць Харкаў. Калі толькі абязлюдзіць, то тады не бамбілі б так інтэнсіўна жылыя масівы. Дастаткова было б знішчэння інфраструктуры. Па ўсім відаць, што агрэсары і ствараюць людзям такія невыносныя ўмовы, пры якіх жыццё стане немагчымым. Уладзімір Зяленскі кажа, што, калі бліжэйшым часам не прыйдзе дапамога Захаду, то расейцы могуць зрабіць з Харкавам тое ж, што ў свой час зрабілі з Алепа ў Сірыі.

Тым часам у горадзе па-ранейшаму застаюцца каля паўтара мільёна чалавек.

Становішча вельмі цяжкае. Што да тэлевышкі, то расейцы спрабавалі збіць яе яшчэ ў 2022 годзе. Тады на яе скідалі бомбы, але безвынікова. Вышка выдужала. Гэта быў самы высокі абʼект у горадзе – 240 метраў. Яе ўдалося збіць 22 красавіка, але наступствы па словах кіраўніка Харкаўскай абласной адміністрацыі Алега Сінягубава ліквідуюць да гэтага часу. Пакуль разбіраюць завалы і ацэньваюць стан абсталявання. Пры гэтым ён робіць аптымістычныя прагнозы, бо большасць жыхароў Харкава і прыгарада маюць спадарожнікавае і кабельнае тэлебачанне. Цяпер у нармальным рэжыме працуюць мабільная сувязь і інтэрнэт. Намеціўся нават прагрэс – электрычнасці няма па 4 гадзіны ў суткі. Усё ж гэта ўжо не поўная яго адсутнасць.

Ваенныя эксперты мяркуюць, што наступленне расейскіх войскаў на Харкаў можа пачацца вельмі хутка. Страта Харкава азначала б страту паўднёвага ўсходу Украіны. Але апошнія падзеі (калі стала відавочным, што Захад не пакіне Украіну ў такім цяжкім становішчы сам-насам з узброеным да зубоў супернікам) даюць надзею на вызваленне.

Менавіта вызваленне, таму што замарожаны канфлікт немагчымы ўжо хаця б таму, што гэта не будзе задавальняць ніводзін з бакоў.

Данбас ператварыўся ў поле бою, і яго загінуўшыя гарады нагадваюць зараз жудасныя кадры з фільмаў пра апакаліпсіс. Данбас акупанты раўняюць з зямлёй і ўвесь свет сочыць за гэтай трагедыяй. Дапамога дае пратрымацца і не пускаць ворага прасоўвацца ўглыб тэрыторыі. Харкаў знаходзіцца побач і ён аказаўся сёння на перадавой. Гэта азначае, што ён можа адчуць на сабе бліжэйшым часам больш моцныя ўдары. Усе спадзевы цяпер на дапамогу Захаду.

Вельмі хочацца, каб эфектыўная СПА абараніла людзей і будынкі, у якіх яны жывуць, ад разбурэння. Хочацца верыць, што своечасовая дапамога можа дапамагчы дабіцца пералому ў гэтай вайне. Людзі вельмі стаміліся, але яны не здаюцца. Яны заслужылі адпачынак і спакойнае нармальнае жыццё. Усе людзі.

belsat.eu 

Рэдакцыя можа не падзяляць меркавання аўтара.

Zgłoś naruszenie/Błąd