Усебеларускае народнае стаянне. На мяжы – сотні аўтаў, содні чакання, чуткі пра новае абмежаванне літоўцаў

Паводле звестак Дзяржаўнага памежнага камітэту, выезду з Беларусі ў краіны ЕЗ цяпер чакае 515 легкавікоў і 25 аўтобусаў. Чэргаў няма толькі на беларуска-літоўскай мяжы, у астатніх пунктах пропуску што ў адзін, што ў другі бок даводзіцца чакаць амаль содні, калі ехаць машынаю. Аўтобусамі выходзіць шпарчэй.

Чарга ў пункце пропуску «Беняконі – Шальчынінкай» на беларуска-літоўскай мяжы. 21 ліпеня 2024 года.

Фота: granica_bypl / Telegram

У Берасці ў чарзе на выезд у Польшчу – 300 легкавых аўтаў, паведамляе Дзяржаўны памежны камітэт. У Telegram-чатах пішуць, што на ўсё пра ўсё патрабуецца ад 16 да 19 гадзінаў. Пры гэтым сам дагляд хуткі, хваляць польскіх службоўцаў:

«Палякі сёння прыгажуны. Працуе шэсць каналаў. 10 хвілінаў – і выехалі».

У Тэрэспалі цяпер – прыкладна такая ж чарга, каля 300 легкавікоў, затое чакаюць крыху даўжэй: 22 гадзіны. На шляху дадому, як сведчаць падарожнікі, «палякі багаж не глядзелі, беларусы дасталі ўсё, але не прыдзіраліся».

У чарзе ў бок Польшчы, паводле Памежнага камітэту, 21 аўтобус. Пасажыры скардзяцца, што пакутуюць на мяжы сама меней 12 гадзінаў, нехта затрымаўся ажно на 18.

У спадзевах мінуць мяжу хутчэй падарожнікі спрабуюць розныя варыянты: напрыклад, едуць з Менску да Берасця на цягніку, потым на таксоўцы да тэрміналу і шукаюць месца ў найбліжэйшым да шлагбаума аўтобусе.

«У выніку ўся мяжа 9,5 гадзіны, і гэта з улікам таго, што мы ўлезлі ў першы бусік перад шлагбаумам», – падзяліліся адпаведным досведам у чаце.

Аўтобуснай чаргі ў Тэрэспалі ў бок Беларусі амаль няма. Паводле польскіх службаў, час чакання афармлення – каля гадзіны, аднак гэта толькі пачатак «прыгодаў». У чатах сцвярджаюць, што абедзве мяжы плюс «душэўныя размовы» спецслужбаў з украінцамі і некаторымі беларусамі агулам даюць каля 14 гадзінаў чакання.

У «Беняконях» на мяжы з Літвою – 115 легкавікоў. Сярэдні час чакання – 16-18 гадзінаў. У «Шальчынінкаі» ў бок Беларусі – каля 20 аўтаў: 7 гадзінаў – і ўдома.

Аўтобуснай чаргі няма, што ў адзін, што ў другі бок на афармленне патрабуецца каля дзвюх гадзінаў.

У чарзе ў «Каменным Лозе» – 100 легкавых машынаў. Выезду ў Літву падарожнікі аддаюць 16-18 гадзінаў жыцця. Скардзяцца на літоўскіх службоўцаў:

«Уся замінка і працяглае чаканне на ўсіх этапах з увагі на мытню Літвы. Увесь час працаваў або не працаваў адзін афіцэр. Папрасіў адкрыць багажнік, задаў мінімум пытанняў: ці ўласнік аўта, якая віза, ці вязу спіртное і тытунь. Пра пасажыраў наогул не пытаўся».

У «Мядзінінкаі» ў бок Беларусі – 140 аўтаў, чакаць даводзіцца ажно 28 гадзінаў.

Аўтобусы ў Беларусь едуць хутка, а ў Літву сёння раніцай мяжу праходзілі за 7 гадзінаў, цяпер афармлення чакаюць 4 аўтобусы.

Пры гэтым ёсць сведчанні, што пры выездзе з Беларусі нашыя службоўцы, што нетыпова, запатрабавалі выгрузіць усе рэчы, у аднаго пасажыра валізу даглядзелі. Што шукалі, невядома.

Тым часам у чатах пачала распаўсюджвацца інфармацыя, што з заўтрашняга дня літоўскія мытнікі будуць спраўджваць наяўныя грошы пры выездзе ў Беларусь:

«З заўтрашняга дня Літва пачне ўзмоцнены кантроль. Вывазіць з тэрыторыі Літвы ў Беларусь гатоўкаю можна толькі 60 еўраў і да 10 тысячаў іншай валюты».

Літоўцы пачалі прыглядацца да грошай ужо сёння:

«На літоўскай мяжы сказалі дастаць усе рэчы, усё спраўджвалі, пыталіся, колькі грошай вязём, правяралі гаманцы, у некага – кішэні. Сказалі, не больш за 60 еўраў на асобу, долары везці можна. Сёння ў каго было больш, прапускалі, аднак памежнік сказаў, што потым будуць канфіскоўваць».

Адзіны пераход, што працуе на беларуска-латышскай мяжы, – самы свабодны. У «Грыгораўшчыне» ў бок Латвіі «20 хвілінаў у зоне чакання, 2 гадзіны беларусаў, 7 хвілінаў латышоў». У бок Беларусі перад шлагбаумам усяго 12 аўтаў.

Раней Латвія і Эстонія забаранілі заезд аўтамабіляў з беларускімі нумарамі, спасылаючыся на санкцыі ЕЗ. Літва таксама анансавала такую захаду, толькі з адтэрмінаваннем да 16 жніўня. Пакуль у гэтую краіну можна заехаць, калі за стырном уласнік. Паводле такога ж правіла Польшча пускае зарэгістраваныя ў Беларусі легкавікі.

У чатах ці то жартуюць, ці то сур’ёзна пішуць, што літоўцы на сваіх аўтах, карыстаючыся бязвізам, могуць наладзіць бізнес у перавозах пасажыраў:

«Едуць у Беларусь, бяруць чатырох пасажыраў і за грошы вязуць у Літву. Мяркую, чэргаў на выезд з Беларусі пасля 17 жніўня ўжо не будзе».

Сцяпан Кубік belsat.eu

Reakcja

0%0Pozytywnie0%0Neutralnie 0%0Negatywnie

Twoje emocje

0%0Lubię to!

0%0Super0%0Ekscytujący 0%0Ciekawy0%0Smieszny0%0Smutny0%0Wściekły0%0Przerażony0%0Szokujący0%0Wzruszający0%0Rozczarowany0%0Zaskoczony

Co sądzisz?

0%0Prawda0%0Manipulacja0%0Fake news

0

0Ulub

Oryginalne źródło ZOBACZ