Сітуацыя ва Украіне: расейцы прасоўваюцца ў ваколіцах Данецку

«Белсат» падводзіць вынікі 791-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 24 красавіка чытайце ў нашым аглядзе.

Здымак мае ілюстрацыйны характар. Украінскія вайскоўцы.

Фота:  Генеральний штаб ЗСУ / Facebook

Купянскі і ліманскі кірункі (усходняя частка Харкаўскай вобласці, захад Луганскай і поўнач Данецкай)

У Генеральным штабе Збройных сілаў Украіны паведамілі пра адбіццё пяці атак праціўніка каля сяла Бераставое на купянскім кірунку, і яшчэ 19 – у ваколіцах населеных пунктаў Грэкаўка, Неўскае, Церны і Ямпалаўка на ліманскім кірунку.

Праўкраінскі тэлеграм-канал «Офіцер» удакладняе, што пад Цернамі – так званы торскі выступ на левым беразе ракі Жарабец на поўначы Данецкай вобласці – войскі РФ пры падтрымцы цяжкай тэхнікі намагаліся высадзіць дэсант, але былі своечасова выяўленыя і разбітыя.

Тым часам у Міністэрстве абароны РФ заявілі, што на паўночным усходзе Украіны іхныя вайскоўцы занялі больш выгадныя рубяжы ў ваколіцах населеных пунктаў Сынькоўка і Петрапаўлаўка ў Харкаўскай вобласці і каля Навасёлаўскага і Дзібровы на Луганшчыне.

Акрамя гэтага ў расейскім ведамстве ўзгадваюць няўдалую контратаку ЗСУ побач з Новавадзяным у Луганскай вобласці.

Бахмуцкі кірунак (лінія фронту на поўначы Данецкай вобласці, а таксама ў Луганскай з поўдня ад ракі Северскі Данец)

На бахмуцкім кірунку ініцыятыва таксама застаецца за Узброенымі сіламі РФ, якія прынамсі 21 раз атакавалі ў ваколіцах населеных пунктаў Белагораўка, Верхнякаменскае, Спірнае, Часаў Яр, Іванаўскае і Клішчыеўка.

Расейскі ваенкар Сямён Пегаў звяртае ўвагу на тое, што хоць баі на ўсходзе Часавага Яру і працягваюцца, але агулам наступ войскаў РФ на горад «забуксаваў».

Прарасейскі тэлеграм-канал «Рыбарь» звязвае нізкі тэмп прасоўванняў з вялікай колькасцю абарончых збудаванняў ЗСУ і шчыльным мініраваннем ваколіцаў населенага пункту.

Пры гэтым украінскія вайскоўцы пасля перакідання рэзерваў на бахмуцкі кірунак контратакуюць і маюць поспех на поўдні ад Іванаўскага (на паўднёвым усходзе ад Часавага Яру).

«Офіцер» піша, што частка самога сяла па-ранейшаму застаецца пад кантролем Збройных сілаў.

Аўдзееўскі і навапаўлаўскі кірункі (на поўначы, захадзе і паўднёвым захадзе ад Данецку)

Больш складаная сітуацыя для ЗСУ фіксуецца ў ваколіцах Данецку.

Аналітыкі праекту Deepstate гавораць, што на аўдзееўскім кірунку Узброеныя сілы РФ прасунуліся ў населеных пунктах Ачарэтына, Новабахмутаўка, Новакалінавае, Бэрдычы і Сямёнаўка.

«Офіцер» піша, што пасля прарыву да Ачэрэтына, расейцы спрабуюць расшырыць фронт у бок Новабахмутаўкі, паколькі ўтвораны вузкі клін уразлівы для контратак з флангаў.

Тэлеграм-канал «Белорусский силовик» сцвярджае, што ў Новабахмутаўцы ЗСУ трапілі ў так званы агнявы мяшок, пасля чаго выйшлі з населенага пункту.

Яшчэ адна прарасейская крыніца – канал «Два майора» – паведамляе пра пачатак баёў за сяло Салаўёва (на захадзе ад Новабахмутаўкі).

Здымак мае ілюстрацыйны характар. Вайсковец Збройных сілаў Украіны.

Фота: Генеральний штаб ЗСУ / Facebook

Генштаб ЗСУ фіксуе атакі праціўніка і ў ваколіцах населеных пунктаў Яснабродаўка, Няйталава, Первамайскае і Невельскае.

У Мінабароны РФ заявілі пра адбіццё шматлікіх контратак украінцаў па ўсёй лініі сутыкнення.

На суседнім навапаўлаўскім кірунку расейцы ціснуць у ваколіцах населеных пунктаў Краснагораўка, Георгіеўка, Новаміхайлаўка і Вадзяное.

Тэлеграм-канал «Фронтовая птичка» сцвярджае, што ў Краснагораўцы УС РФ прасунуліся да цэнтральнай часткі гораду, а таксама зайшлі на тэрыторыю мясцовага цагельнага заводу.

У Deepstate гавораць, што таксама войскі РФ маюць поспех у сяле Георгіеўка.

«Рыбарь» піша, што расейцы, пасля захопу Новаміхайлаўкі, рухаюцца ў бок населеных пунктаў Парасковіеўка і Канстанцінаўка, адначасова з гэтым працягваюцца баі за садовае таварыства «Машынабудаўнік» (на поўначы ад Новаміхайлаўкі).

Бярдзянскі, арэхаўскі і херсонскі кірункі (захад Данецкай, а таксама Запарожская і Херсонская вобласці)

На бярдзянскім кірунку працягваюцца баі на так званым урэмеўскім выступе на мяжы Данецкай і Запарожскай вобласцяў.

Украінскае камандаванне паведамляе пра адбіццё шматлікіх атак праціўніка ў ваколіцах сёлаў Ураджайнае і Старамаёрскае.

Тэлеграм-канал расейскіх вайскоўцаў «Воин DV» піша, што самыя ЗСУ атакавалі каля Ураджайнага, але таксама не дасягнулі поспеху.

У цэнтральнай частцы Запарожскай вобласці баявыя дзеянні лакалізуюцца на выступе па фронце з поўдня ад гораду Арэхаў.

Тэлеграм-канал «Два майора» фіксуе прасоўванні расейцаў на паўночным захадзе ад сяла Вэрбовае. Таксама, паводле крыніцы, УС РФ занялі адзін з апорных пунктаў у суседнім Работыне.

Між тым аналітыкі Deepstate адмаўляюць поспехі войскаў РФ на кірунку.

У Херсонскай вобласці зменаў па лініі сутыкнення не фіксуецца: расейцы па-ранейшаму атакуюць плацдармы ЗСУ на левым беразе Дняпра, але пакуль сілы абароны Украіны ўдала абараняюцца.

На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.

Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.

Наталля Кулыгіна belsat.eu

Reakcja

0%0Pozytywnie0%0Neutralnie 0%0Negatywnie

Twoje emocje

0%0Lubię to!

0%0Super0%0Ekscytujący 0%0Ciekawy0%0Smieszny0%0Smutny0%0Wściekły0%0Przerażony0%0Szokujący0%0Wzruszający0%0Rozczarowany0%0Zaskoczony

Co sądzisz?

0%0Prawda0%0Manipulacja0%0Fake news

0

0Ulub

Oryginalne źródło ZOBACZ