Суд ААН назваў парушэннем міжнароднага права акупацыю Ізраілем палестынскіх тэрыторыяў

Міжнародны суд Арганізацыі аб’яднаных нацыяў 19 ліпеня пастанавіў (PDF), што акупацыя Ізраілем земляў на Заходнім беразе ракі Іярдан і ва Усходнім Іерусаліме незаконная, парушае міжнароднае права і мае быць спыненая, за акупацыю належыць выплаціць рэпарацыі. Рашэнне суду кансультацыйнае і не мае абавязковай моцы.

Здымак мае ілюстрацыйны характар. Будаўніцтва ізраільскага паселішча Гіват Хатамар на Заходнім беразе ракі Іярдан. 30 снежня 2016 года.

Фота: Ronan Shenhav / Flickr, CC BY-NC 2.0

Пытанне разглядалі на запыт Генеральнай асамблеі ААН, у суду прасілі выказаць меркаванне аб практыцы Ізраілю адносна палестынцаў і аб прававым статусе акупацыі. Суд у Гаазе пастанавіў, што акупацыя тэрыторыяў Палестынскай аўтаноміі незаконная, а Ізраіль мусіць як мага хутчэй гэтую акупацыю спыніць.

Гаворка не пра ўвесь Ізраіль, які знаходзіцца ў гістарычнай вобласці Палестына, а толькі пра тэрыторыі Палестынскай аўтаноміі на Заходнім беразе ракі Іярдан і ва Усходнім Іерусаліме, які Ізраіль акупуе па выніках шасцідзённай вайны 1967 года. Пасля той вайны Ізраіль збудаваў на гэтых тэрыторыях каля 160 паселішчаў, у якіх цяпер жывуць каля 700 тысяч ізраільцянаў. Паводле суду ААН, гэта раўназначна анексіі тэрыторыяў, над якімі Ізраіль не мае суверэнітэту.

Акрамя таго, суд палічыў, што з вывадам ізраільскіх паселішчаў і войскаў з сектару Газа ізраільская акупацыя не спынілася, паколькі Ізраіль яшчэ чыніць актыўны кантроль над гэтай тэрыторыяй.

На акупаваных тэрыторыях, паводле суду ААН, Ізраіль ладзіць сістэмную дыскрымінацыю палестынскіх арабаў на падставах расы, рэлігіі ці этнічнага паходжання; эксплуатуе прыродныя рэсурсы, парушае права на самавызначэнне. За акупацыю і шкоду палестынцам Ізраіль мае выплаціць рэпарацыі.

Дзяржава Палестына – часткова прызнаная і толькі часткова падкантрольная сваім уладам. На Заходнім беразе ракі Іярдан Палестынская нацыянальная аўтаномія цалкам кантралюе толькі 17 % тэрыторыі, дзе жыве толькі 55 % насельніцтва. Яшчэ на чвэрці тэрыторыі палестынцы маюць цывільную адміністрацыю, а Ізраіль мае вайсковы кантроль, а на амаль 60 % тэрыторыі Ізраіль мае вайсковы і цывільны кантроль. Сектар Газа з 2007 года кантралявала не Палестынская нацыянальная аўтаномія, а тэрарысты «Хамас». Пасля атакі тэрарыстаў на Ізраіль 7 кастрычніка 2023 года Ізраіль вядзе вайну з тэрарыстамі ў сектары Газа і кантралюе вялікую частку тэрыторыі сектару.

Прэм’ер-міністр Ізраілю Бэньямін Нэтаньягу раскрытыкаваў рашэнне суду ААН: сказаў, што «габрэйскі народ не зяўляецца акупантам на сваёй зямлі – ні ў нашай вечнай сталіцы Іерусаліме, ні на зямлі нашых продкаў у Юдэі і Самарыі». Ён дадаў, што законнасць ізраільскіх паселішчаў на Заходнім беразе Іярдану «не можа быць аспрэчаная». Апазіцыя ж настойвае на тым, што палітыка Ізраілю на Заходнім беразе памылковая, ёсць фактычнай анексіяй і «крадзяжом зямлі».

Палестынскія ўлады віталі рашэнне Міжнароднага суду ААН. Аднак гэтае рашэнне ні да чаго не абавязвае Ізраіль. Ды і гэты суд не ўпершыню называе тое, што Ізраіль робіць на тэрыторыі Палестынскай аўтаноміі, акупацыяй.

Алесь Наваборскі belsat.eu

Reakcja

0%0Pozytywnie0%0Neutralnie 0%0Negatywnie

Twoje emocje

0%0Lubię to!

0%0Super0%0Ekscytujący 0%0Ciekawy0%0Smieszny0%0Smutny0%0Wściekły0%0Przerażony0%0Szokujący0%0Wzruszający0%0Rozczarowany0%0Zaskoczony

Co sądzisz?

0%0Prawda0%0Manipulacja0%0Fake news

0

0Ulub

Oryginalne źródło ZOBACZ