«Нясуць інфармацыю разладу», «фабрыка фальшывых чутак»: што пра «Белсат» пісалі ў КДБ?

Сярод зваротаў у Камітэт дзяржаўнай бяспекі знайшліся даносы на «Белсат». «Неабыякавыя грамадзяне» патрабавалі спыніць трансляцыю нашага каналу ў YouTube, назвалі нас «фабрыкаю фальшывых чутак» і абвінавачвалі ў «інфармацыі разладу паміж уладаю і грамадзянамі».

Будынак Камітэту дзяржаўнай бяспекі. Менск, Беларусь. 21 траўня 2021 года.

Фота: Белсат

База зваротаў да чэкістаў трапіла ў рукі «Кіберпартызанаў» у выніку ўзлому. Сярод лістоў багата просьбаў даць інфармацыю пра рэпрэсаваных за савецкім часам сваякоў, тысячы паведамленняў з бязглуздзіцай ад спамераў, звароты родных палітвязняў, а таксама натуральныя даносы. «Неабыякавыя грамадзяне» пісалі і пра «Белсат».

Мужчына, які падпісаўся Алегам Краўчанкам, у сакавіку 2017 года скарадзіўся, што «Белсат» выкарыстаў фота з ім і сынам «у сваіх нядобрых мэтах». Здымак быў зроблены каля Кастрычніцкай плошчы ў Менску, калі там праходзіла акцыя супраць «дармаедскага» дэкрэту Лукашэнкі.

«Была міліцыя, у якой я пацікавіўся, што адбываецца. Акурат у гэты момант мяне сфатаграфавалі рэпарцёры «Белсату» як незадаволенага. Хачу адказна заявіць, што, па-першае, я грамадзянін Расеі і папросту не ўдзельнічаю ў палітычных акцыях. Па-другое, усім вядома, што так званая апазіцыя – праеўрапейская і супраць таго курсу, які праводзіць глыбокапаважаны прэзідэнт РБ на шчыльнае ўзаемадзеянне з РФ, што не можа не выклікаць у мяне сімпатыю», – піша даносчык.

Ён сцвярджае, што на яго «ўзвялі паклёп», бо выставілі яго нібыта ўдзельнікам пратэсту. «Атрымліваецца, «Белсат» – фабрыка фальшывых чутак, што хоча пасеяць беспарадкі ў грамадстве, а не апазіцыйнае медыя», – падсумоўвае расеец.

Ён прывёў спасылку на публікацыю, дзе нібыта ёсць гэты здымак, аднак там фатаграфіяў з акцыі ў Менску няма.

Ньюсрум тэлеканалу «Белсат». 20 сакавіка 2024 года. Варшава, Польшча.

Фота: Таццяна Верамеева / Белсат

Іншы даносчык, які не падаў свайго прозвішча, а толькі імя і імя па бацьку – Аляксандр Іванавіч – у 2021 годзе напісаў у КДБ пра відэа, знятае на заводзе ў Баранавічах і распаўсюджанае «Белсатам».

«На маю думку, гэты «аператар» з заводу ў Баранавічах за такую дзейнасць мусіць валіць лес», – напісаў мужчына. На відэа, за якое ён патрабуе пасадзіць відавочцу, – патоп на прадпрыемстве.

Грамадзянін, які назваўся Анатолем Міхеевым з салігорскага ПМС (прадпрыемства меліярацыйных сістэмаў), у даносе ў студзені 2018 года назваў «Белсат» і «Хартыю’97» «сфармаванай сістэмаю дэзынфармацыі». Мужчына папрасіў КДБ даць «выразны адказ» на пытанне, што ў ведамстве думаюць пра гэтыя два медыі.

Цяпер гэты даносчык кажа, што «ўжо не памятае» пра зварот:

«Я не памятаю такога, я КДБ баюся, вы што! Дзе я, а дзе КДБ? І наогул, такія пытанні па тэлефоне не абмяркоўваюцца, да пабачэння!»

На журналістаў «Белсату» ў 2018 годзе скардзіўся і суўладальнік менскага барбершопу «Чэкіст» Алег Кот. Ён быў не задаволены, што нашыя карэспандэнты разам з калегамі з радыё «Свабода» асвятлялі акцыю Змітра Дашкевіча і Эдуарда Пальчыса супраць назвы ўстановы. Кот заявіў, што барбершоп пачалі цкаваць, «нас перасталі наведваць шмат якія нашыя кліенты, паводле іх, яны проста сталі баяцца актывістаў».

«Гэтая сітуацыя стварыла вялікі рэзананс у грамадстве, і нашыя патэнцыйныя кліенты адвярнуліся ад нас. Прашу правесці праверку і прыняць захады», – напісаў бізнесовец.

У даносе ад імя Крысціны Гуркінай Камітэт дзяржбяспекі папрасілі «звярнуць увагу на канал «Белсат» на YouTube»:

«Абражаюць прэзідэнта, міліцыю. Нясуць інфармацыю разладу паміж уладаю і грамадзянамі», – сігналізавала жыхарка Мікашэвічаў у 2018 годзе.

Мянчук Віталь Янкоўскі ў 2020 годзе звярнуўся ў КДБ з «вялікай просьбай спыніць трансляцыю па YouTube каналу «Белсат», з якога паліваюць брудам прэзідэнта РБ і ладзяць інструкцыі на тэму “Што рабіць, калі вас затрымаюць пры падтрыманні актывістаў”»:

«У гэтым канале канкрэтна падбухторваюць народ на каляровую рэвалюцыю. Вельмі хочацца, каб гэтай брыдоты не было ў інтэрнэце. Дзякуй за разуменне», – напісаў мужчына.

«Проста выказаў сваю пазіцыю» грамадзянін, які назваўся Аляксандрам Рачкоўскім з Гомля:

«Канал “Белсат” адкрыта не толькі заклікае да масавага непадпарадкавання, забойства работнікаў праваахоўных органаў, але і рэкламуе акцыі: калі, як і што рабіць. Чаму не заблакуеце, як “Хартыю’97”? Адказу не трэба. Проста выказваю сваю пазіцыю», – напісаў пільны грамадзянін у 2020 годзе.

Асоба, што назвалася Яўгеніем з Сумскай вобласці Украіны, раіла беларускім кадэбістам паглядзець адну з трансляцыяў «Белсату» з Віцебску ў разгар мірнай рэвалюцыі ў 2020 годзе. Мужчына напісаў, што ў натоўпе нібыта былі нейкія куратары, а беларусы выходзілі на пратэсты за грошы:

«А вы спіце і розуму хапае толькі АМАПам плюшчыць. Людзі пачынаюць вас ненавідзець. Працуйце з каналамі грошай і іх атрымальнікам. Не спіце. Поспехаў».

26 лютага 2022 года, праз два дні пасля пачатку расейскага ўварвання ва Украіну, вялікі ліст у КДБ напісаў мянчук Алег Бабец – аўтар кнігі «Досвед вайсковай выведкі на службе ў камерцыйнай фірме». Ён абвінаваціў «Белсат» у «масіраванай інфаатацы» і быў не задаволены, што «нехта пастаянна здымае вайсковую тэхніку» – імаверна, з увагі на паведамленні пра тое, што расейцы наступалі ў тым ліку з тэрыторыі Беларусі.

Гэтыя матэрыялы, як адзначыў мужчына, «выклікалі гнеў украінцаў» на адрас беларусаў, і на ягоную думку, вінаваты ў гэтым «Белсат», а не цяперашнія ўлады, якія дазволілі наступ на Украіну са сваёй тэрыторыі.

«Бяздзейнасць да смерці падобная, інфабруд множыцца. Камітэту тэрмінова неабходны аддзел контрпрапаганды. Магу падзяліцца думкамі з уласнага досведу. Ідзецца не пра блакаванне дэзынфармацыі, а пра супрацьдзеянне. Калі заўгодна – антыфейкаў, каб спыніць агрэсію, што распухае, як ядравы грыб, сярод украінцаў у дачыненні беларусаў», – напісаў Бабец.

Ён паведаміў, што адбудаваў у ўкраінскім Бярдзянску (цяпер пад расейскай акупацыяй) нейкую базу для рэабілітацыі чарнобыльцаў, і яму «тысячу гадоў не патрэбная агрэсія з боку ўкраінцаў».

Мужчына заклікаў КДБ да інфармацыйнага апрацоўвання ўкраінцаў:

«Тэхнічная служба мае забяспечыць выпуск ілжывых сведчанняў, падстаўных асобаў, контрвідэасюжэтаў. Мусіць фармавацца база асабліва агрэсіўна настроеных суседзяў, якія з наступам расейскіх войскаў сыдуць у падполле. Нават антыбеларускі піск, лічу, мусіць быць спынены. Гатовы да дыялогу».

Ва ўзламанай базе знайшоўся таксама зварот у падтрыманне «Белсату», падпісаны «Кіберпартызанамі». Аўтары ліста прыгадалі прысуд журналісткам Кацярыне Андрэевай і Дар’і Чульцовай, пазначылі прозвішчы ўсіх, хто датычны да пераследу нашых каляжанак:

«Вы што, думаеце, што лука-прусак забярэ вас з сабою ў “Boeing”? Толькі калі ў магілу. Пасля прыходу законнай улады будзе ўхваленая крымінальная адказнасць за фіктыўныя бяздоказныя выракі з кампенсацыяй шкоды пацярпелым, ад 10 гадоў строгага рэжыму з канфіскацыяй маёмасці. Знойдзем вас паўсюль. Не схаваецеся. Гітлераўскіх катаў і карнікаў дасюль шукаюць і судзяць».

Сцяпан Кубік belsat.eu

Reakcja

0%0Pozytywnie0%0Neutralnie 0%0Negatywnie

Twoje emocje

0%0Lubię to!

0%0Super0%0Ekscytujący 0%0Ciekawy0%0Smieszny0%0Smutny0%0Wściekły0%0Przerażony0%0Szokujący0%0Wzruszający0%0Rozczarowany0%0Zaskoczony

Co sądzisz?

0%0Prawda0%0Manipulacja0%0Fake news

0

0Ulub

Oryginalne źródło ZOBACZ