Напрыканцы чэрвеня Узброеныя сілы Беларусі распавядалі пра складаную сітуацыю на мяжы з Украінай і рызыку «пранікнення на тэрыторыю нашай краіны дыверсійна-разведвальных групаў». Падчас візіту ў 56 зенітны полк 13 ліпеня ў Лунінецкім раёне Лукашэнка заявіў, што напружанасці больш няма і загадаў адвесці войскі.
Лукашэнка распавёў, нібыта КДБ і ваенная выведка даклалі яму, што пасля праведзенай Беларуссю працы «украінцы свае ўзброеныя сілы і дадатковыя войскі, якія перакінулі да нашай мяжы – нямала тысяч чалавек – ад мяжы адвялі і наагул вывелі з зоны беларуска-ўкраінскай мяжы».
«То бок, тыя войскі, якія ўзмацнялі іхныя дзеянні, з мяжы сышлі, – сказаў Лукашэнка. – <…> цяпер у нас ускладненняў ніякіх няма з украінцамі. І я спадзяюся, што і не будзе».
Кіраўнік Беларусі зазначыў, што «беларускі бок не хацеў гэтага абвастрэння, і яно яму абсалютна не патрэбнае» і «тым больш гэта не патрэбна Украіне – у іх хапае гэтых праблем».
«Хачу, каб людзі ведалі (я абсалютна перакананы і давяраю нашай выведцы): сітуацыя стабілізаваная на беларуска-ўкраінскай мяжы. Войскі іхныя адведзеныя. Таму і нашыя войскі трэба прыбраць з мяжы. Каб яны разумелі, што мы не збіраемся ваяваць і не збіраемся тут канцэнтраваць свае Узброеныя сілы, акрамя сілаў спецыяльных аперацыяў», – сказаў Лукашэнка.
Паводле беларускіх уладаў, абвастрэнне на паўднёвай мяжы было заўважана пару тыдняў таму, і гэта нібыта выклікала «сур’ёзную трывогу ў насельніцтва», на што трэба было рэагаваць.
«Я быў вымушаны, наколькі гэта магчыма, супакоіць насельніцтва, што ніякай вайны не будзе, мы не дапусцім эскалацыі на нашай мяжы», – казаў Лукашэнка на сходзе з нагоды афіцыйнага Дня незалежнасці 3 ліпеня.
Hавiны
«Спробы ўцягнуць нашую краіну ў вайну». Мінабароны Беларусі заяўляе пра сцягванне Украінай войскаў да мяжы
2024.06.29 20:14
Начальнік Генштабу Узброеных сілаў Беларусі, першы намеснік міністра абароны Павел Муравейка 29 чэрвеня заявіў, што каля мяжы з украінскага боку былі заўважаныя падраздзяленні спецназу, а таксама перасоўванні войскаў і зафіксаваныя перыядычныя палёты беспілотнікаў тыпу «Байрактар», якія парушаюць дзяржаўную мяжу.
Сілы спецыяльных аперацыяў УС Беларусі заявілі пра нарастанне напружанасці на мяжы і «праходы для ДРГ». Начальнік зенітных ракетных войскаў камандавання паветраных сілаў і войскаў СПА Андрэй Севярынчык распавёў, што ў Беларусі дадаткова выведзеныя сілы і сродкі СПА «для прыкрыцця паўднёвых межаў, а таксама крытычна важных аб’ектаў». У Міністэрстве абароны Беларусі заявілі, што на баявое дзяжурства на мяжы вывелі сістэму «Паланэз» з поўным боекамплектам.
Спікер Дзяржаўнай памежнай службы Украіны Андрэй Дземчанка казаў, што Украіна Беларусі не пагражае, «але, пакуль Беларусь застаецца ў арбіце ўплыву краіны-тэрарыста, Украіна будзе нарошчваць сваю абароназдольнасць, каб даць адпор усім, хто ідзе да нас з Беларусі з вайной».
13 ліпеня украінскі Цэнтр нацыянальнага супраціву (ЦНС), арганізаваны пад эгідай Сілаў спецыяльных аперацыяў, заявіў, што мае інфармацыю пра падрыхтаванне беларускімі сілавікамі аперацыі пад чужым сцягам у памежнай зоне з Украінай.
Hавiны
Ва Украіне заявілі, што Беларусь рыхтуе правакацыі «пад чужым сцягам»
2024.07.13 10:56
Марыя Міхалевіч belsat.eu
Zgłoś naruszenie/Błąd
Oryginalne źródło ZOBACZ
Dodaj kanał RSS
Musisz być zalogowanym aby zaproponować nowy kanal RSS