«Белсат» працягвае сачыць за рэпрэсіямі, якія з дня ў дзень адбываюцца ў нашай краіне.
Здымак мае ілюстрацыйны характар. Былая турма КДБ у Вільні, якая падобная да месца зняволення беларускіх палітвязняў. Вільня, Літва. 27 чэрвеня 2024 года.
Фота: Белсат
1 жніўня ў Менскім гарадскім судзе пачнецца суд над маці блогеркі Вольгі Такарчук – 63-гадовай Ірынай Такарчук. Яе затрымалі 23 студзеня 2024 году падчас масавага рэйду сілавікоў на сваякоў палітвязняў. Ёй выставілі абвінавачванне па ч. 2 арт. 361-4 Крымінальнага кодэкса («Садзейнічанне экстрэмісцкай дзейнасці»).
Гомельскі абласны суд 6 жніўня будзе разглядаць справу 55-гадовага былога міліцыянта Вілена Тургунава, якога абвінавачваюць паводле трох артыкулаў Крымінальнага кодэкса: ч. 3 арт. 361 («Заклікі да санкцый, іншых дзеянняў, накіраваных на прычыненне шкоды нацыянальнай бяспецы Рэспублікі Беларусь»), ч. 1 арт. 130 («Распальванне іншай сацыяльнай варожнасці») і ч. 2 арт. 367 (паклёп на Лукашэнку). Суд зрабілі закрытым. Мужчыну пагражае да 12 гадоў калоніі.
24 ліпеня ў Берасцейскім абласным судзе прайшоў суд над 63-гадовым Юрыем Лагадзюком – адным з найлепшых беларускіх трэнераў па настольным тэнісе, які займаўся рэабілітацыяй людзей з інваліднасцю. Мужчыну судзілі за садзейнічанне «экстрэмісцкай дзейнасці» паводле ч. 1 арт. 361-4 Крымінальнага кодэкса. Сутнасць абвінавачвання праваабаронцам невядомая. Паводле гэтага артыкулу Юрыю Лагадзюку пагражае да 6 гадоў калоніі. Вынік суда пакуль невядомы.
Сёння стала вядома пра затрыманне мужчыны, які падчас пратэстаў 2020 года быў паранены сілавікамі. У тэлеграм-канале прапагандыстаў паведамляецца, што мужчына пакінуў каментар «Ябатьки захватили админа?» ў захопленым сілавікамі ў панядзелак чаце «Чат Бурдейного». Таксама сцвярджаецца, што затрыманы пакідаў «негатыўныя каментары» ў іншых чатах.
Супраць удзельніка працоўнай групы «Хрысціянскай візіі» Дзмітрыя Карняенкі распачалі крымінальную справу за «садзейнічанне экстрэмісцкай дзейнасці» за інтэрв’ю «Белсату». Супраць Дзмітрыя, якія быў вымушаны з’ехаць з Беларусі, раней ужо распачалі вытворчасць паводле ч. 1 арт. 361 КК («Удзел у экстрэмісцкім фармаванні»), да гэтага яго таксама судзілі паводле адміністрацыйных справаў за ўдзел у пратэстах у 2020 годзе.
Спевака Руслана Мусвідаса, які з’яўляецца салістам Нацыянальнага акадэмічнага канцэртнага аркестра імя Фінберга, будуць судзіць за ўдзел у пратэстах. Працэс пачнецца 26 ліпеня ў судзе Партызанскага раёна Менска.
У судзе Кастрычніцкага раёна Менску 24 ліпеня пачаўся суд над 28-гадовай Аленай Гуцік, яе судзяць паводле ч. 1 арт. 342 КК за ўдзел у пратэсных акцыях.
У Беларусі з’явілася 13 новых палітвязняў: Аляксандр Катовіч, Віктар Мярзлікін, Аляксей Чарнавусаў, Вольга Волкава, Наталля Цімашэнка, Аляксандр Капылец, Аляксандра Мельнічак, Аляксандр Блізнец, Уладзімір Баслыка, Аляксандр Лазарэвіч, Ігар Сушко, Руслан Прахарэнка.
У судзе Савецкага раёна Менска 6 жніўня адбудзецца суд над Антонам Вайцяховічам, які працуе 3D-візуалізатарам. Маладога чалавека абвінавачваюць паводле ч. 1 арт. 342 КК («Актыўны ўдзел у дзеяннях, што груба парушаюць грамадскі парадак»). Пры затрыманні ў канцы траўня Антона абвінавачвалі ва ўдзеле ў акцыях пратэсту, абразах у адрас Рыгора Азаронка, злівах у «Чорную кнігу Беларусі» і рэгістрацыі ў чат-боце плана «Перамога». У якасці доказу ягонай віны сілавікі паказалі кадры з кнігай «Рэвалюцыя» Віктара Марціновіча, якую пры ператрусе знайшлі ў хлопца.
16 траўня ў судзе Барысаўскага раёна прайшоў суд над палітвязнем Сяргеем Яфімавым. Яму дадалі яшчэ адзін год паводле арт. 411 Крымінальнага кодэкса («Злоснае непадпарадкаванне патрабаванням адміністрацыі папраўчай установы») ў дадатак да чатырох гадоў калоніі. Гэта ўжо другі суд над Сяргеем паводле гэтага артыкула, папярэдні прысуд быў агучаны ў 2023 годзе ў Жодзіне.
Сёння стала вядома пра затрыманне жыхара Магілёва за каментары ў Telegram, якія ён пакідаў у адрас супрацоўнікаў міліцыі. Пакаяльнае відэа з мужчынам з’явілася ў тэлеграм-канале сілавікоў.
24 ліпеня ў Гарадзенскім абласным судзе працягнуўся працэс над бас-гітарыстам кавер-гурта «BAND 777» Уладзімірам Навумовічам, яго судзяць паводле двух крымінальных артыкулаў: ч. 1 арт. 368 (абраза Лукашэнкі) і ч. 3 арт. 361-1 («Стварэнне экстрэмісцкага фармавання або ўдзел у ім»). Гэта ўжо трэцяе пасяджэнне. Першае адбылося 15 ліпеня.
Чарговы ператрус прайшоў у праваабаронцы і рэдактара партала orsha.еu Ігара Казмерчака. Гэта адбылося, верагодна, у рамках новай крымінальнай справы, распачатай супраць тых, хто даваў інтэрв’ю СМІ, унесеным у спіс «экстрэмісцкіх фармаванняў». Вядома таксама, што сёлета ў сакавіку Казмерчака было пачатае спецвядзенне. Яму выставілі абвінавачанні паводле ч. 1 арт. 368 КК (абраза Лукашэнкі) і ч. 1 і 2 арт. 361-4 КК («Садзейнічанне экстрэмісцкай дзейнасці»).
24 ліпеня Міністэрства ўнутраных справаў прызнала праект «Propovednik» «экстрэмісцкім фармаваннем». Паводле ведамства, дачыненне да яго мае 52-гадовы Шпак Уладзімір. Вядома таксама, што адміністратара гэтага праекта затрымалі ў траўні гэтага года – паводле сілавікоў, яму пагражае да 10 гадоў зняволення.
Раман Шавель belsat.eu
Zgłoś naruszenie/Błąd
Pozytywnie
Neutralnie 
Negatywnie
Lubię to!
Super
Ekscytujący 
Ciekawy
Smieszny
Smutny
Wściekły
Przerażony
Szokujący
Wzruszający
Rozczarowany
Zaskoczony
Prawda
Manipulacja
Fake news
Oryginalne źródło ZOBACZ
Dodaj kanał RSS
Musisz być zalogowanym aby zaproponować nowy kanal RSS