За забойства і не толькі. СК Беларусі завёў тры крымінальныя справы на ўлады Польшчы, Літвы і Латвіі

Следчы камітэт Беларусі расследуе тры крымінальныя справы ў дачыненні кіраўніцтва Польшчы, Літвы і Латвіі, паведамляе аддзел інфармацыі і сувязі з грамадскасцю СК.

Фота мае ілюстрацыйны характар. Тэрыторыя ля вёскі Гжыбаўшчызна ў Падляскім ваяводстве, Польшча. 20 жніўня 2021 года.

Фота: Белсат

На падставе характару злачынстваў дзеянні службовых асобаў кваліфікавалі паводле пяці артыкулаў Крымінальнага кодэксу Беларусі: прапаганда вайны, злачынствы супраць бяспекі чалавецтва, наўмыснае прычыненне цяжкага цялеснага пашкоджання, пакіданне ў небяспецы і забойства.

Крымінальныя справы завялі ў сувязі з сітуацыяй з уцекачамі на мяжы Беларусі і гэтых дзяржаваў.

Як паведамляе СК, пацярпелымі ў крымінальнай справе ў дачыненні службовых асобаў Польшчы праходзяць 166 замежных грамадзянаў, якія праязджалі транзітам праз Беларусь у краіны ЕЗ. У дачыненні Латвіі выяўлена 38 пацярпелых, а ў літоўскай справе – 36 чалавек. Некаторыя з іх загінулі, астатнія атрымалі цялесныя пашкоджанні рознай ступені цяжкасці.

«Найбольшая колькасць пацярпелых – гэта выхадцы з Іраку, Ірану, Афганістану, Індыі, Сірыі і дзяржаваў Афрыканскага кантыненту», – удакладняюць у Следчым камітэце.

Ведамства заяўляе, што пры выяўленні целаў каля межаў з Літвой, Польшчай і Латвіяй «на месцы здарэння ёсць сляды, якія сведчаць аб валачэнні, а наяўнасць целаў іншаземцаў паблізу брамаў, прызначаных для міграцыі жывёлы, сведчыць аб тым, што іх проста перакінулі з сумежных тэрыторыяў».

Міграцыйны крызіс быў штучна створаны рэжымам Аляксандра Лукашэнкі. Крызіс пачаўся ў канцы вясны 2021 года. Адпраўным пунктам стаўся скандал з захопам самалёта «Ryanair», які пацягнуў за сабою маштабныя абмежавальныя захады з боку Еўразвязу, у тым ліку ўвядзенне сектаральных санкцыяў. У гэтай сітуацыі рэжым Аляксандра Лукашэнкі даў зразумець, што разглядае міграцыйнае пытанне як механізм для шантажу Еўразвязу і помсты за санкцыі.

Польскія, літоўскія і латышскія памежнікі неаднаразова дэманстравалі відэа (напрыклад, такое), як іхныя беларускія калегі не толькі не перашкаджаюць парушаць закон, але і спрыяюць пераходу мяжы незаконным шляхам. Журналісты ж не раз даказвалі, што на нелегальнай міграцыі зарабляюць беларускія кампаніі, у тым ліку блізкія да атачэння Лукашэнкі.

Ася Саковіч belsat.eu

Reakcja

0%0Pozytywnie0%0Neutralnie 0%0Negatywnie

Twoje emocje

0%0Lubię to!

0%0Super0%0Ekscytujący 0%0Ciekawy0%0Smieszny0%0Smutny0%0Wściekły0%0Przerażony0%0Szokujący0%0Wzruszający0%0Rozczarowany0%0Zaskoczony

Co sądzisz?

0%0Prawda0%0Manipulacja0%0Fake news

0

0Ulub

Oryginalne źródło ZOBACZ