«Белсат» падводзіць вынікі 781-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 14 красавіка чытайце ў нашым аглядзе.
Украінскія вайскоўцы.
Фота: Генеральний штаб ЗСУ / General Staff of the Armed Forces of Ukraine / Facebook
Купянскі і ліманскі кірункі (паўночна-ўсходняя частка Харкаўскай вобласці, захад Луганскай і поўнач Данецкай)
У Генеральным штабе Збройных сілаў Украіны паведамілі, што цягам апошніх содняў сілы абароны краіны адбілі шэраг атак праціўніка ў ваколіцах населеных пунктаў Верхнякаменскае, Выемка, Спірнае і Раздолаўка на поўначы Данецкай вобласці, а таксама каля Белагораўкі на Луганшчыне.
Пры гэтым у Міністэрстве абароны РФ заявілі, што іхныя вайскоўцы палепшылі сваё становішча па пярэднім краі на асобных участках фронту на паўночным усходзе Украіны.
Таксама ў ведамстве адзначылі, што ЗСУ контратакавалі каля сяла Выемка, але поспеху не дасягнулі.
Бахмуцкі кірунак (лінія фронту ў ваколіцах аднайменнага гораду ў Данецкай вобласці)
На бахмуцкім кірунку ініцыятыва па-ранейшаму застаецца за Узброенымі сіламі РФ, якія наступаюць на захадзе і поўдні ад аднайменнага раённага цэнтру.
Украінскі Генштаб піша пра шматлікія безвыніковыя атакі праціўніка каля населеных пунктаў Часаў Яр, Іванаўскае, Вопытнае, Клішчыеўка і Андрэеўка.
Між тым расейскі ваенкор Сямён Пегаў гаворыць, што войскі РФ прасоўваюцца з поўначы ад гораду Часаў Яр, а таксама на поўначы ад сяла Клішчыеўка.
Прарасейскі тэлеграм-канал «Рыбарь» мяркуе, што УС РФ палепшылі тактычнае становішча на паўночным захадзе ад Клішчыеўкі.
Прасоўванні расейскіх вайскоўцаў на кірунку пацвярджае і праўкраінскі «Говорять Снайпер».
У сваю чаргу аналітыкі праекту Deepstate пішуць, што войскі РФ цалкам кантралююць сяло Багданаўка (на паўночным усходзе ад гораду Часаў Яр), хоць Мінабароны Украіны адмаўляе гэта.
Аўдзееўскі і навапаўлаўскі кірункі (на поўначы, захадзе і паўднёвым захадзе ад Данецку)
На аўдзееўскім кірунку наступальная актыўнасць расейцаў, паводле Генштабу ЗСУ, фіксуецца на захадзе ад аднайменнага гораду ў ваколіцах населеных пунктаў Новакалінавае, Новабахмутаўка, Бэрдычы, Танэнькае, Первамайскае і Невельскае.
Разам з тым Мінабароны РФ сцвярджае, што іхныя вайскоўцы палепшылі становішча каля сяла Новакалінавае.
Па інфармацыі тэлеграм-каналу «Рыбарь», цяпер баі ідуць на паўднёвых ускрайках населенага пункту.
Байцы Збройных сілаў, якія трымаюць абарону на кірунку, гавораць, што сітуацыя застаецца кантраляванай, хоць расейцы і маюць істотную перавагу ў жывой сіле і тэхніцы і паступова прасоўваюцца на захад. Адзначаецца, што пры гэтым праціўнік мае вялізныя страты, большая частка з якіх адбываецца пры спробах перакінуць дадатковыя сілы да пярэдняй лініі. У гэты ж час самыя ЗСУ маюць праблемы з ратацыяй, што адмоўна ўплывае на стан байцоў.
На навапаўлаўскім кірунку расейцы наступаюць каля населеных пунктаў Краснагораўка, Георгіеўка і Новаміхайлаўка. Пегаў гаворыць, што каля Краснагораўкі баі маюць сустрэчны характар. Істотных зменаў лініі сутыкнення не фіксуецца.
Бярдзянскі, арэхаўскі і херсонскі кірункі (захад Данецкай, а таксама Запарожская і Херсонская вобласці)
На бярдзянскім кірунку расейцы ціснуць на так званым урэмеўскім выступе (на мяжы Данецкай і Запарожскай вобласцяў) каля сёлаў Ураджайнае і Старамаёрскае.
Мінабароны РФ піша пра паляпшэнне становішча ў ваколіцах Ураджайнага. Прарасейскі тэлеграм-канал «Воин DV» удакладняе, што пад кантроль УС РФ перайшоў адзін з апорных пунктаў.
У цэнтральнай частцы Запарожскай вобласці баявыя дзеянні лакалізуюцца ў ваколіцах гораду Арэхаў.
Расейскае камандаванне заявіла пра лакальныя поспехі каля сяла Чароўнае (на ўсходзе ад гораду).
Іншыя прарасейскія крыніцы фіксуюць працяг баёў у сяле Работына, а таксама на паўночным захадзе ад суседняга Вэрбовага.
Праўкраінскі тэлеграм-канал «Офіцер» звяртае ўвагу на тое, што расейцы за апошнія паўтара месяца паступова занялі так званую шэрую зону каля Вэрбовага, і цяпер, імаверна, плануюць адсюль наступаць у бок Работына, дзе іхныя штурмавыя групы ніяк не могуць прасунуцца.
У Херсонскай вобласці баявыя дзеянні ідуць на левым беразе Дняпра, дзе расейцы намагаюцца выбіць праціўніка з займаных плацдармаў. Пакуль лінія сутыкнення застаецца нязменнай.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
Zgłoś naruszenie/Błąd
Pozytywnie
Neutralnie 
Negatywnie
Lubię to!
Super
Ekscytujący 
Ciekawy
Smieszny
Smutny
Wściekły
Przerażony
Szokujący
Wzruszający
Rozczarowany
Zaskoczony
Prawda
Manipulacja
Fake news
Oryginalne źródło ZOBACZ
Dodaj kanał RSS
Musisz być zalogowanym aby zaproponować nowy kanal RSS